Fertilizers : देशात रासायनिक खतांच्या विक्रीत वाढ

1 min read

April 11, 2023 विशेष प्रतिनिधी

Fertilizers : सन 2022-23 या आर्थिक वर्षाच्या एप्रिल-फेब्रुवारी या 11 महिन्यांच्या कालावधीत देशात रासायनिक खतांच्या एकूण विक्रीत 2 टक्क्यांनी वाढ झाली आहे. युरियाची (Urea) विक्री 7 टक्क्यांनी वाढली असून, डाय-अमोनियम फॉस्फेटच्या (Di-ammonium phosphate) विक्रीत 15 टक्के वाढ झाली आहे. याच कालावधीत म्यूरिएट ऑफ पोटॅश (एमओपी) आणि (Muriate of Potash) कॉम्प्लेक्स या खतांच्या (Complex fertilizers) इतर दोन श्रेणींचा वापर घटला आहे.

आर्थिक वर्ष 2022-23 च्या एप्रिल – फेब्रुवारी या 11 महिन्या दरम्यानच्या कालावधीत देशात युरियाचा वापर 341.18 लाख टन एवढा हाेता. सन 2021-22 या आर्थिक वर्षात युरियाचा वापर 338.64 लाख टन हाेता. नॅनो युरियाच्या (Nano urea) वापरायला सुरुवात झाल्याने देशातील पारंपरिक युरियाचा वापर कमी होईल, अशी अपेक्षा सरकारने व्यक्त केली आहे.

सरकार अन्नसुरक्षेवर परिणाम न होऊ देता, पारंपरिक युरियाचा वापर कमी करू इच्छित आहे. मात्र, त्याचवेळी सरकारचा पर्यायी जैव खतांच्या उपलब्धतेची खात्री न करता शेतकऱ्यांना रासायनिक खतांचा वापर कमी करण्यास भाग पाडण्याचा कुठलाही विचार नाही, असे केंद्रीय खत मंत्रालयाने स्पष्ट केले.

2022-23 या आर्थिक वर्षाच्या एप्रिल-फेब्रुवारी या कालावधीत प्रमुख खतांची (युरिया, डीएपी, एमओपी आणि कॉम्प्लेक्स) एकूण विक्री 559.97 लाख टनांवर पोहोचली आहे. सन 2021-22 मध्ये या खतांची विक्री 547.09 लाख टन हाेती. त्यामुळे रासायनिक खतांच्या विक्रीत 2.4 टक्क्यांची वाढ नाेंदविण्यात आली आहे. युरिया व डीएपीची विक्री 15.3 टक्क्यांनी वाढून 101.35 लाख टन, एमओपी विक्री 34.7 टक्क्यांनी घटून 15.21 लाख टन आणि कॉम्प्लेक्स खतांची विक्री 11.6 टक्क्यांनी घटून 102.23 लाख टन झाली आहे.