Rain forecast : आजपासून गुरुपौर्णिमेपर्यंत पाच दिवस मध्यम ते जोरदार पावसाची शक्यता!
1 min read
Rain forecast : महाराष्ट्रात आजपासून (रविवार, दि. 6 जुलै) पाच दिवस म्हणजेच गुरुपौर्णिमेपर्यंत (गुरुवार, दि. 10 जुलै) मध्यम (Moderate rain) ते जोरदार पावसाची (Heavy rain) शक्यता निर्माण झाली आहे.
🔆 जोरदार पाऊस
आजपासून ( दि. 6 जुलै) पुढील पाच दिवस म्हणजे गुरुवार (दि. 10 जुलै)पर्यंत नंदुरबार तसेच मुंबईसह संपूर्ण कोकण व विदर्भातील 19 जिल्ह्यांत आणि जळगाव, धुळे, नाशिक, पुणे, सातारा व कोल्हापूर अशा 6 जिल्ह्यातील शिरपूर, सिंदखेडा, चोपडा, यावल, रावेर, मुक्ताईनगर, एदलाबाद, सुरगाणा, कळवण, दिंडोरी, पेठ, त्र्यंबकेश्वर, नाशिक, इगतपुरी, जुन्नर, लोणावळा, खंडाळा, मावळ, मुळशी, वेल्हे भोर, महाबळेश्वर, जावळी, पाटण, शाहूवाडी, बावडा, राधानगरी, चांदगड व लगतच्या परिसरात जोरदार पावसाची शक्यता जाणवते. त्यामुळे घाटावर उगम पावणाऱ्या महाराष्ट्रातील गोदावरी, दारणा, गिरणा, वैतरणा, कश्यपी, कडवा, प्रवरा, भीमा, नीरा, इंद्रायणी, मुळा, मुठा, कुकडी, कृष्णा, कोयना, पंचगंगा, वारणा, दूधगंगा व भोगावती ह्या नद्या पूर-पाण्यासह दुथडी वाहू शकतात.
🔆 मध्यम पाऊस
संपूर्ण मराठवाड्यातील 8 आणि संपूर्ण अहिल्यानगर जिल्हा तसेच जळगाव, धुळे, नाशिक, पुणे, सातारा व कोल्हापूर अशा 6 जिल्ह्यातील वर्षच्छायेच्या प्रदेशातील उर्वरित तालुक्यात आजपासून (दि. 6 जुलै) पुढील तीन दिवस म्हणजे मंगळवार (दि. 8 जुलै) पर्यंत मध्यम पावसाची शक्यता निर्माण झाली आहे. त्यापुढील दाेन दिवस म्हणजे बुधवार (दि. 9 जुलै) व गुरुवारी (दि. 10 जुलै) या भागात तुरळक ठिकाणी किरकोळ पावसाची शक्यता जाणवते. शुक्रवार (दि. 11 जुलै)पासून काहीशी उघडीप, काहीशी रिमझिम तर मधूनच सूर्यदर्शन अशा वातावरणाची शक्यता जाणवते.
कृषिसाधना....
