Monsoon rain : मान्सून जागेवरच, पण पावसासाठी अनुकूल वातावरण!

1 min read

June 22, 2023 माणिकराव खुळे

Monsoon rain : आज (बुधवार दि. 21 जून) वर्षातील सर्वात मोठा दिवस असून, मध्य भारतातील छत्तीसगड, झारखंड, ओडिशा व मध्य प्रदेशसारख्या मैदानी भागात सुरू असलेल्या उष्णतेच्या लाटेसदृश (Heat waves) स्थिती महाराष्ट्रात केवळ विदर्भातच आपण आजपर्यंत अनुभवत आहोत. बुधवार (दि. 21 जून) व गुरुवार (दि. 22 जून)पर्यंत ही लाट टिकून राहण्याची शक्यता आहे. शुक्रवार (दि.23 जून)पासून हळूहळू ही लाटसदृश स्थिती लोप पावेल. सध्या मान्सून (Monsoon) जागेवरच असला तरी राज्यात पावसासाठी (rain) अनुकूल वातावरण (favorable environment) तयार हाेत आहे.

✴️ या परिणामामुळे तसेच बंगालच्या उपसागरातील आंध्र प्रदेश, ओडिशाच्या किनारपट्टीवरील 3 किमी उंचीवरील चक्रीय वाऱ्याच्या स्थितीमुळे मान्सूनची बंगाल शाखा पूर्व किनारपट्टीकडे वाटचाल करू शकते.

✴️ मान्सूनच्या बंगालच्या शाखेमुळे अरबी समुद्रात थंडावलेली मान्सूनची शाखाही उर्जीतावस्थेत येईल. परंतु, सुरुवातीला तिचा जोर कोकणात अधिक तर सह्याद्रीच्या पूर्वेकडील वर्षाच्छायेच्या प्रदेशात (विशेषतः अहमदनगर, पुणे व सातारा या जिल्ह्यात) सध्या तरी काहीसा कमी जाणवेल.

✴️ शुक्रवार (दि. 23 जून)पासून महाराष्ट्रात काही ठिकाणी ‘पूर्वमोसमी’ तर काही ठिकाणी ‘मोसमी’ पावसाच्या असलेल्या शक्यतेनुसार उद्या, गुरुवार (दि. 22 जून)पासून हळूहळू पावसासाठी वातावरणात बदल होण्याची शक्यता निर्माण झाली आहे.

✴️ महाराष्ट्रात शुक्रवार (दि. 23 जून), शनिवार ( दि. 24 जून), रविवार (दि. 25 जून) व साेमवार (दि. 26 जून) या काळात तुरळक ठिकाणी किरकोळ ते मध्यम पावसाची अपेक्षा करू या!

✴️ कोकणात पावसाचा जोर अधिक राहण्याची शक्यता असून, मुंबईसह संपूर्ण कोकणातील चार जिल्हे व गोव्यात तसेच विदर्भातही उद्यापासूनच म्हणजे गुरुवार (दि. 22 जून) व त्यापुढील पाच दिवस म्हणजे सोमवार (दि. 26 जून)पर्यंत जोरदार ते अतिजोरदार पावसाची शक्यता जाणवते.

✴️ मध्य महाराष्ट्र व मराठवाड्यात मात्र शुक्रवार (दि. 24 जून)पासून पावसाची शक्यता जाणवते. सध्या वातावरणीय बदल एवढाच जाणवतो.