अरे सरकारा (Government)… हा सोयाबीनचा दाणा नाही माह्या संसाराचा कणा आहे

🌐 शेतकऱ्यांच्या गळ्याचा फास
सालाबादाप्रमाणे शेतकऱ्याच्या घरात सोयाबीनचे पीक यायला लागले आणि सरकारने बाहेरून सोयाबीन आयात करून आपल्या देशातील शेतकऱ्यांच्या सोयाबीनचे दर पाडले आणि कष्टकरी शेतकऱ्याचे पूर्णपणे कंबरडे मोडले. आवश्यक वस्तूंचा कायदा (Essential Commodities Act) व विदेश व्यापार कायदा (Foreign Trade Act) शेतकऱ्यांच्या गळ्याचा फास ठरला. खरं म्हणजे शेती आणि शेतकरी आधीच लंगडत चालतोय. त्यातच भरीस भर म्हणजे त्यांच्या विरोधातील सरकारचे हे ध्येय धोरण आणि शेतकरी विरोधी कायदे, त्याला जगू देत नाहीत आणि मरूही देत नाहीत.

🌐 पिकवणाऱ्यापेक्षा खाणाऱ्याचा जास्त विचार
या देशामध्ये पिकवणाऱ्यापेक्षा खाणाऱ्याचा जास्त विचार केला जातो. खाद्यतेलाचे भाव गगनाला भिडले होते, त्यावेळेस या सरकारला काहीच करता आले नाही. कारण तेव्हा सगळा माल व्यापाऱ्यांच्या, भांडवलदारांच्या गोडाउनमध्ये होता. पेट्रोल, डिझेल व इतर काही वस्तू व कृषी निविष्ठांच्या किमती दिवसेंदिवस झपाट्याने वाढत चालल्या आहेत. मात्र, शेतकऱ्यांचे पीक मातीमोल होऊन शेतकरी मातीमध्ये गाडला जातो आहे. या सरकारातील लोकांना त्याचे काहीच सोयरसुतक नाही. निव्वळ भांडवलदारांसाठीच काहीही करायला तयार असणारे हे सरकार इंग्रज सरकारपेक्षाही निर्दयी आहे, असं म्हणायला हरकत नाही. कारण इंग्रज सरकारने शेतकऱ्यांच्या विरोधात जितके कायदे केले होते, त्यापेक्षाही कडक कायद्यांची अंमलबजावणी आत्ताच सरकार करत आहे. कोरोना काळामध्ये शेतीने देशाचा ‘जीडीपी’ (GDP – Gross domestic product) सावरला होता. हे कृतघ्न सरकार विसरून गेलेल आहे. हा सोयाबीनचा दाणा, दाणा नसून, शेतकऱ्याच्या संसाराचा कणा आहे, हे सरकारातील लोकांनी विसरू नये.

🌐 सरकार शेतकऱ्यांचे मारेकरी
पावसामुळे शेतमालाचे झालेल्या नुकसानीचा पंचनामा करून त्याला काहीतरी देण्याऐवजी त्यालाच लुबाडलं जात आहे. राज्यातील आणि केंद्राच्या सरकारातील आमदार-खासदारांना मंत्र्यांना व त्यांचे झेंडे घेऊन फिरणाऱ्या कार्यकर्त्यांना आत्ता का शेतकऱ्यांचा पुळका येत नाही. निवडणुका आल्या की घोषणांचा पाऊस पाडणारे शेतकऱ्यांसाठी जीव देऊ म्हणणारे, सभावर सभा गाजवणारे राजकीय वक्ते कुठे गेलेत? त्यांना हे सारं दिसत नाही का? शेतकऱ्यांचा पिक विमा, शेतकऱ्यांची फसवी कर्जमाफी, शेतकऱ्यांचे उत्पन्न दुप्पट करू, अशी घोषणा हे सर्व काय होतं की नुसताच जूमला होता निवडणुकीपुरता? होय, खरंच हा नुसता जुमला होता. व्यापाऱ्यांशी भांडवलदारांशी संगनमत करून शेतकऱ्यांच्या मालाचे भाव पाडून निवडणुका लढवण्यासाठी पैसे मिळतात म्हणून व्यापाऱ्यांची बाजू घेणारे सरकार खऱ्या अर्थानं शेतकऱ्याचे मारेकरी ठरले आहे.

🌐 शेतकरी पुत्रांनो आता तरी एकत्र या
अस्मानी आणि सुलतानी संकटांना तोंड देत शेतकरी आशाळभूत नजरेनं सरकारकडे पाहत आहे. मात्र या निर्दयी लोकांना त्याचे काहीच वाटत नाही. याला कारण म्हणजे शेतकऱ्यांमध्ये नसलेली एकजूट. शेतकरी कधीच एकत्र येत नाही. आपल्या हक्कांसाठी, प्रश्‍नांसाठी लढत नाही. म्हणून आज शेतकऱ्यांची ही अवस्था झालेली आहे. शेतकऱ्यांनो, शेतकरी पुत्रांनो आता तरी एकत्र या आणि आपल्या पदरात काही तरी पाडून घ्या

कृषिसाधना....

संतोष पाटील

संपर्क :- 7666447112
मेल :- santoshpatil1680@gmail.com

See author's posts