शेतकरी आत्महत्या ही राष्ट्रीय आपत्ती : 19 मार्चला उपवास का करायचा?

✴️ शेतकाऱ्यांना गळफास ठरलेले कायदे
👉 कमाल शेतजमीन धारणा (सीलिंग) कायदा.
(Ceiling Act)
👉 आवश्यक वस्तू कायदा.
(Essential Commodities Act)
👉 जमीन अधिग्रहण कायदा.
(Land Acquisition Act)
आदी शेतकरीविरोधी (Anti-farmer) नरभक्षी कायदे रद्द करा!

✴️ शेतकरीविरोधी कायदे
शेतकऱ्यांच्या आत्महत्या ह्या आत्महत्या नसून सरकारने पाडलेले खून (Murder) आहेत. कारण शेतकरी आत्महत्यांचे मूळ कारण काही कायदे आहेत. ते मागच्या सरकारांनी केले आहेर व वर्तमान सरकार देखील ते कायदे रद्द करीत नाही. कमाल शेतजमीन धारणा (सीलिंग), आवश्यक वस्तू, जमीन अधिग्रहण आदी नरभक्षी कायदे शेतकरी आत्महत्यांचे मूळ कारण आहेत. ते तत्काळ रद्द झाले पाहिजेत. हे कायदे पक्षपात करणारे आहेत. मुलभूत अधिकारात (Fundamental Rights) हस्तक्षेप करणारे आहेत. घटना विरोधी आहेत. ते टिकून राहावे म्हणून आपल्या मूळ घटनेत नसलेले पण पहिली घटना दुरुस्ती करून टाकलेले 9 वे परिशिष्ट हे होय. या परिशिष्टात टाकलेल्या कायद्यांच्या विरोधात न्यायालयात जाता येत नाही. म्हणून हे कायदे टिकून राहिले आहेत. परिशिष्ट 9 मध्ये आज 284 कायदे आहेत त्यापैकी 250 कायदे थेट शेतकऱ्यांशी संबंधित आहेत. सीलिंग, आवश्यक वस्तू, अधिग्रहण हे कायदे या परिशिष्टात असल्यामुळे ते टिकून राहिले आहेत. शेतकऱ्यांचा प्रश्न गरिबीचा (Poverty) नसून गुलामीचा (Slavery) आहे. म्हणून शेतकऱ्यांना या कायद्यातून सोडवणे महत्वाचे आहे असे किसानपुत्र आंदोलनाचे म्हणणे आहे.

✴️ 19 मार्चचा कार्यक्रम
👉 अन्नत्याग/उपवास/उपोषण- जेथे असाल तेथे.
👉 पदयात्रा- 17 ते 19 मार्च- पानगाव ते आंबाजोगाई
👉 किसानपुत्रांचा मेळावा- 19 मार्च- दुपारी 3 वा- मुकुंदराज सभागृह, आंबाजोगाई. उपोषण सांगता व भोजन.

✴️ प्रत्येक संवेदनशील माणसाचे कर्तव्य!
👉 शेतकरी सहवेदना व्यक्त करण्यासाठी.
👉 आत्महत्या केलेल्या तमाम शेतकऱ्यांना श्रद्धांजली व्यक्त करण्यासाठी.
👉 शेतकरी आत्महत्याना कारणीभूत ठरलेल्या कमाल शेतजमीन धारणा (सीलिंग), आवश्यक वस्तू, जमीन अधिग्रहण आदी नरभक्षी कायद्यांचा विरोध करण्यासाठी.
👉 शेतकरी स्वातंत्र्याचा संकल्प बळकट करण्यासाठी.

✴️ उपवास का करायचा?
19 मार्च 1986 रोजी साहेबराव करपे यांच्या संपूर्ण कुटुंबाने आत्महत्या केली होती. वीज बिल भरले नाही म्हणून त्याची वीज कट करण्यात आली होती. ते वीज बिल भरू शकले नाही. जमीन विकायला काढली तर ग्राहक नाही. अशा परिस्थितीत साहेबराव यांना आत्महत्या करावी लागली. 2017 पासून किसानपुत्र आंदोलनाच्या वतीने दरवर्षी 19 मार्च रोजी ‘अन्नत्याग आंदोलन’ केले जाते. या आंदोलनात महाराष्ट्रातीलच नव्हे तर देशातील व विदेशात गेलेले किसान पुत्र देखील सहभागी होतात. लाखाहून अधिक लोक 19 मार्चला उपवास करतात. 2017 साली साहेबराव करपे यांचे गाव चिलगव्हाणला (जिल्हा यवतमाळ) भेट देऊन महागाव (जिल्हा यवतमाळ) येथे उपोषण केले. 2018 साली साहेबराव कुटुंबीयांनी जेथे आत्महत्या केली, त्या दत्तपूर (जि. वर्धा) जवळ पवनार आश्रम येथे उपोषण केले. पुढच्या वर्षी दिल्लीत महात्मा गांधी समाधी परिसरात देशातील अन्य राज्यातील मित्रांसोबत उपवास केला. 2020 साली पुण्यात महात्मा फुले वाड्याला भेट देऊन बालगंधर्वच्या समोर उपोषण केले. गेल्या वर्षी औंढा नागनाथ येथून चिलगव्हाणपर्यंत किसानपुत्रांनी पदयात्रा काढली होती. चिलगव्हाण येथे उपवासाची सांगता करण्यात आली होती.

✴️ पदयात्रा
यावर्षी आम्ही पानगाव येथून पदयात्रा काढीत आहोत. पदयात्रेत महाराष्ट्रातील 20 जिल्ह्यातून आलेले 50 किसानपुत्र भाग घेणार आहेत. 1980 साली पोलीस गोळीबारात ठार झालेल्या हुतात्मा रमेश मुगे यांच्या स्मारकाला अभिवादन करून ही पदयात्रा निघेल. ती फावडेवाडी, चोपनवाडी मार्गे जाऊन घाटनांदूर येथे मुक्काम करेल. 18 तारखेला ही पदयात्रा दत्तपूर मार्गे पुसला जाईल व गिरवली येथे मुक्काम करेल. गिरवली येथे महिलांचा मेळावा होईल. डॉ शैलजा बरुरे या मेळाव्याला मार्गदर्शन करतील. 19 मार्च रोजी धायगुडा पिंपळा मार्गे पदयात्री अंबाजोगाईला जातील. दुपारी अडीच वाजता अंबाजोगाईच्या आंबेडकर चौकात या पदयात्रेचे स्वागत होईल. 3 वाजता श्री मुकुंदराज साभागृहात किसानपुत्रांचा मेळावा होईल. या मेळाव्याला अमर हबीब, डॉ राजीव बसरगेकर. सुभाष कच्छवे व महाराष्ट्रातील भिन्न जिल्ह्यातून आलेले किसानपुत्र मार्गदर्शन करतील. सुदर्शन रापतवार हे सूत्र संचालन करतील. पदयात्रेचे संयोजक सुभाष कच्छवे आहेत.

✴️ आवाहन
जोपर्यंत शेतकऱ्यांच्या आत्महत्या होत राहतील तोपर्यंत दरवर्षी 19 मार्च रोजी किसानपुत्र उपवास करीत राहतील. शेतकरी आत्महत्यांचे संकट लवकर दूर व्हावे यासाठी किसानपुत्रांची ही धडपड आहे. 19 मार्च रोजी जास्तीजास्त लोकांनी उपवास करावा, असे आवाहन अमर हबीब, सुभाष काच्छवे, दत्ता वालेकर, डोणे गुरुजी व शेतकरी संघटनेचे कार्याध्यक्ष कालिदास आपेट यांनी केले आहे.

अमर हबीब,
किसानपुत्र आंदोलन, अंबाजोगाई.
मो. 8411909909

कृषिसाधना....

विशेष प्रतिनिधी

See author's posts