Onion price : अहिल्यानगर जिल्ह्यातील गावरान कांदा भाव पाडण्याचे षडयंत्र
1 min read
Onion price : अहिल्यानगर जिल्ह्यातील बाजार समित्यांमध्ये शेतमालाची MSP पेक्षा कमी भावात खरेदी करून शेतकऱ्यांची लूट सुरू आहे. दुसरीकडे नाशिक जिल्ह्यातील अत्यंत नगण्य लाल कांद्याच्या (Red onions) आवकेची (Arrivals) भीती दाखवून अहिल्यानगर जिल्ह्यातील शेतकऱ्यांच्या विविध व्हॉटस्ॲप ग्रुपमध्ये एक निनावी मेसेज व्हायरल करण्यात येत आहे की, नाशिक जिल्ह्यात लाल कांद्याची प्रचंड प्रमाणात आवक वाढल्याने अहिल्यानगर जिल्ह्यातील गावरान कांद्याचे भाव (price) मोठ्या प्रमाणात पडत आहेत, असा निनावी मेसेज व्हायरल करून अहिल्यानगर जिल्ह्यातील गावरान कांदा उत्पादक शेतकऱ्यांना भीती घालण्यात येत आहे. हे अहिल्यानगर जिल्ह्यातील गावरान कांदा भाव पाडण्याचे षडयंत्र आहे.
अहिल्यानगर जिल्ह्यातील शेतकऱ्यांच्या विनंती आहे की, नाशिक जिल्ह्यात अतिवृष्टीमुळे लाल कांद्याच्या पिकाचे 70 ते 80 टक्के नुकसान झाले आहे. त्यामुळे नाशिक जिल्ह्यातील बाजार समित्यांमध्ये लाल कांद्याची आवक रोज फक्त 30 ते 35 टन होत आहे. ही आवक अत्यंत नगण्य प्रमाणात आहे. त्यामुळे गावरान कांद्याच्या भावावर काहीच परिणाम होऊ शकत नाही. परंतु काही शेतकरी विघातक घटक असे निनावी मेसेज व्हायरल करून शेतकऱ्यांचे कांदा भाव पाडण्याचे षडयंत्र करत आहेत.
अहिल्यानगर जिल्ह्यातील शेतकऱ्यांना आवाहन आहे की, त्यांनी असे मेसेज फॉरवर्ड करून व्हायरल करू नयेत. अशा अफवांवर विश्वास ठेवू नये. अशा अफवा पसरवून भाव पाडण्याचे षडयंत्र करणाऱ्या विरुद्ध सायबर क्राईममध्ये तक्रार दाखल करावी तसेच नाशिक लाल कांदा आवकेचे कारण सांगून अहिल्यानगर जिल्ह्यातील व्यापारी जर गावरान कांदा अत्यंत कमी भावात खरेदी करीत असतील तर त्यांची रितसर तक्रार बाजार समितीच्या सभापती, संचालक व सचिव यांचेकडे करून तक्रारीची रीतसर पोहोच घ्यावी. तशीच तक्रार आपल्या तालुक्याच्या तालुका सहाय्यक निबंधक सहकारी संस्था व जिल्हा सहायक निबंधक सहकारी संस्था यांचेकडे करून भाव पाडण्याचे षडयंत्र रचून कमी भावात कांदा खरेदी करणाऱ्या व्यापाऱ्यांचे लायसन रद्द करण्याची आणि सदर कृषी उत्पन्न बाजार समिती बरखास्त करण्याची मागणी तक्रार मध्ये करावी लागेल. त्याचसोबत राज्याचे कृषिमंत्री दत्तात्रय भरणे व पणनमंत्री जयकुमार रावल यांचेकडे लेखी तक्रार दाखल करावी, असे आवाहन आहे.
शेतकरी मित्रांनो, आपली लूट आपल्याला स्वतःच थंबवावी लागणार आहे. दुसरे कोणीच आपली लूट थांबवायला येणार नाही, हे पक्क ध्यानात ठेवा आणि लुटीत भागीदार झालेल्या सगळ्यांना कायमचा धडा व अद्दल घडवायची असल्यास तक्रार दाखल करण्याची हिंमत करणे गरजेच आहे. नाशिक जिल्ह्यातील लाल कांदा आवक मागील आठवड्यात अत्यंत नगण्य प्रमाणात होत आहे. पुढील काळातही कमीच राहणार आहे, त्याबाबत सखोल आकडेवारीसह विश्लेषण नाशिक जिल्ह्यातील विंचूर येथील शेतकरी आणि शोध पत्रकार मित्र पंकज जोशी यांचा माहितीपर व्हिडिओची लिंक खाली देत आहे
शेतकरी मित्रांनो, हिंमत करणार का? तुम्ही हिंमत करणार असाल तर या लढाईत शेतकरी संघटना व स्वतंत्र भारत पक्ष अहिल्यानगर तुमच्या खांद्याला खांदा लावून ही लढाई लढण्यास तयार आहे. गरज आहे तुम्ही पण हिंमत करून तक्रार दाखल करून एक पाऊल पुढे टाकण्याची. अहिल्यानगर जिल्ह्यात कांदा भाव पाडण्यासोबतच भुसार पिकांचे सोयाबीन, मका, कापूस या शेतमालाच्या खरेदीत पण मोठी लूट केली जात असल्याच्या तक्रारी येत आहेत. त्यासाठी विक्रीची पक्की पावती घ्यावी त्यावर मालाचा ओलावा (मोईश्चर) किती आहे आणि मालाला भाव काय दिला, याची पक्की पावती घ्यावी लागेल. तीच पावती तक्रार दाखल करण्यास पुरावा म्हणून उपयुक्त आहे. त्या पावतीची झेरॉक्स प्रत काढून तक्रार अर्ज आपल्या तालुक्याच्या ठिकाणी तालुका सहायक निबंधक सहकारी संस्था आणि जिल्हा सहायक निबंधक सहकारी संस्था यांना करायची आहे आणि आपल्याला लुटणाऱ्या व्यापाऱ्यांचे लायसन्स रद्द करण्याची आणि बाजार समितीच्या सभापती, संचालक व सचिव यांना बरखास्त करण्याची मागणी शासनाकडे करण्याची गरज आहे, तरच आपली लूट फसवणूक कायमची बंद होऊ शकते. या लढाईत शेतकरी मित्रांच्या सक्रिय सहभागाची अत्यंत गरज आहे. कृपया हिंमत करून तक्रार दाखल करा. अधिक माहितीसाठी संपर्क साधावा, असे आवाहन आहे.
कृषिसाधना....
